سر جدي حكايات زهرة
عمي قال على جدي انه بقى حمل تقيل عليه ورفض يتكفل بيه فزقه علينا علشان نراعيه ووقتها بدأت مشاكلي مع مراتي بس اللي شوفته في اوضة الكراكيب اللي سكناه فيها صدمني صدمة عمري !!!!!!
الأوضة اللي خصصناها لجدي كانت عبارة عن أوضة وصالة صغيرة، بس في الحقيقة كانت أشبه ب عشة خشب مبنية جنب البيت الأساسي، مساحتها متجيش عشرة متر. كنا زمان بنكركب فيها الكراكيب والحاجات القديمة، ودلوقتي اضطرينا ننضفها عشان جدي يسكن فيها.
يا جدي، ريح رجلك شوية على الدكة هنا، عقبال ما أنضفلك الأوضة.
وأنا بكلمه، صوتي كان بيرعش شوية.
مش من التأثر، لأ، من التوتر والقلق.
مكنتش عارف إزاي هواجه التغيير المفاجئ ده في حياتنا.
جدي هز راسو، ومطقش بولا كلمة.
قعد ساكت على عتبة الباب، وبص لبعيد..
كأنه شايف حاجة إحنا مش شايفينها.
العشة كانت مليانة كراكيب مكسرة وهدوم قديمة روبابيكيا.
قعدت أنا ومراتي زينب طول الظهرية ننضف ونشيل، لحد ما فضينا مكان يكفي سرير بالعافية عشان ينام عليه.
وزينب وهي بتشيل الحاجة، وشها كان مقلوب ومش عاجبها الحال.
البيت أصلاً ضيق وشبر في شبر، ودلوقتي زاد علينا راجل عجوز!
كانت بتنضف وهي بتبوز وتتحلطم.
ده جدي يا زينب، مش أي حد.
عارفة إنه جدك، بس إحنا حالنا على القد وبالعافية ممشيين البيت.
زينب وقفت ونفضت إيدها، وبصتلي
وعمك الكبير اللي بيته قصور وعلالي، مش قادريستحمله ليه؟
سكت ومقدرتش أرد.
لأني أنا نفسي مكنتش فاهم ليه.
عمي الكبير فعلاً مبسوط وعنده شغل كتير، وسامع إنه بيرتب لمشروع كبير مع ناس واصلين في القاهرة.
وبيته واسع جداً، يعني لقمة وسترة لراجل عجوز مش هتاخد منه حاجة.
يمكن مراته مش موافقة.
ده كان التخمين الوحيد اللي قدرت أقوله.
وإحنا يعني اللي موافقين ومبسوطين؟
صوت زينب علي وبقى حاد.
الموضوع مش موضوع موافقة
حطيت المقشة من إيدي وبصتلها
ده جدي، من دمي ولحمي، ومقدرش أرميه في الشارع.
زينب مسكتش، بس بدأت تنضف بعنف أكتر.
كل خبطة وهبدة كانت بتعبر عن الغضب اللي جواها.
وقت العشا، قعدنا إحنا الأربعة حوالين الطبلية الصغيرة.
جدي كان قاعد مستقيم، وماسك المعلقة بتمكن.
بس وهو بيغرف الأكل، كان باين عليه الحرص الشديد، بياخد فتافيت بس.
كل يا جدي، مكسوف من إيه؟
حطيتله حتة لحمة مسبكة في طبقه.
بصلي، وبعدين بص لزينب، وفي الآخر خد حتة صغيرة وأكلها.
الحمد لله، شبعت.. أنا كبرت ومعدتش باكل كتير.
صوته كان واطي جداً، كأنه خايف يزعج حد.
زينب فضلت موطية راسها وبتاكل، ومقالتش ولا كلمة.
ابني الصغير سيد، اللي عنده تلت سنين، بص لجدي بفضول
يا جدي، أنت قاعد عندنا ليه؟
السؤال ده خلى الجو يبقى مشحون ومحرج أكتر.
عشان ألعب مع سيد حبيبي.
جدي ابتسم ابتسامة باهتة.
طب وليه مش بتروح بيتك؟
الواد كمل أسئلته العفوية.
كل يا سيد، وبطل أسئلة كتير.
أخيراً زينب اتكلمت، بس صوتها كان ناشف ويقطع الخميرة من البيت.
جدي وطى راسه، وكمل أكله في صمت.
لمحت إيده وهي بترعش رعشة خفيفة.
مش عارف من الكبر، ولا من حاجة تانية.
أول أسبوع، جدي كان عايش بحرص شديد، كأنه ماشي على البيض.
كل يوم يصحى بدري جداً، قبل أي حد، ويغسل وشه ويتوضى.
وبعدين يقعد في الحوش الفسحة اللي قدام البيت، ويبص للسما ويسرح.
ساعات كان بيحاول يساعد ويكنس الحوش أو يمسح الطبلية.
بس زينب كانت علطول تروح تعيد وراه المسح والتنضيف.
الناس الكبار نظرهم بيبقى ضعيف، ومبينضفوش كويس.
ده التبرير اللي كانت بتقولهولي.
أنا كنت عارف إنها بتعمل كده قاصدة.
وجدي كمان كان عارف.
بس مكنش بيتكلم.
في كل وجبة، كان لسه بياكل قليل جداً.
يا جدي، في حاجة تعباك؟ مش بتاكل ليه؟
سألته بقلق.
لأ يا حبيبي،
هز راسه
وبعدين أنتو بتتعبوا في الشغل، كلو أنتو وشبعوا.
البيت مستور والخير كتير يا جدي، متبقاش حساس كده.
عارف يا ابني، عارف.
هز راسه، بس فضل ياخد لقم صغيرة.
كنت حاسس إنه مش عايز يكون عبء علينا.
وده كان بيحسسني بضيق وغصة في قلبي.
بعد أسبوعين، لقيت جدي بدأ يشغل نفسه بحاجة في الحوش.
مش عارف جاب منين شوية عصيان خيزران وحبال وليف.
قعد في ركن، وإيده بدأت تشتغل بمهارة وتنسج حاجة.
بتعمل إيه يا جدي؟
سألته بفضول.
بعمل قبقاب ليفة لسيد الصغير.
مرفعش راسه وفضل مركز في شغله.
مين دلوقتي بيلبس قباقيب ليفة؟ ده العيال كلها بتلبس كوتشيات وماركات.
زينب قالتها بتهكم وبرود.
القبقاب الليفة بيريح الرجل، وصحي.
جدي كمل شغله ومتهزش.
وكمان مش بيكلف حاجة.
زود الجملة دي وهو بيبتسم.
فهمت قصده من الجملة دي.
هو مش عايزنا نصرف عليه فلوس.
وده خلى الضيق اللي جوايا يزيد أكتر.
يا جدي، متقولش كده، إحنا مش ناقصنا فلوس عشان نشتري كوتشي لسيد.
عارف يا حبيبي، أنا بس بسلي وقتي.
رفع راسه وابتسم لي.
ابتسامة باهتة بس مليانة حنية.
زينب نادتلي وقالت بغضب...حتى جدك عارف ان حالنا على القد، ومحتاجين اللي يشيلنا، مش اللي نشيله!
ده جدي يا زينب! مش حد غريب!
أنا كمان بدأت أتعصب
لو كنا فقرا، مش هنرمي أهلنا في الشارع!
زينب بصتلي كتير، وعينها مليانة غضب.
وبعدين رزعّت الباب ودخلت الأوضة.
جدي كان قاعد في الحوش، وماسك القبقاب اللي لسه مخلصش.
كنت عارف إنه سمع خناقتنا.
يا جدي، متضايقش نفسك.
قعدت جنبه على الأرض.
زينب بس خلقها ضيق اليومين دول، وهتروق وتبقى كويسة.
أنا فاهم يا ابني.
هز راسه
الشباب عليهم حمل كبير، وأنا فعلاً تقيل عليكم.
متقولش كده يا جدي.
أنا كمان كنت شاب، وعارف إن فتح البيت مش سهل.
وقف
زمان، لما أبوك كان صغير، كنا على الحديدة، وساعات مكنش بيبقى فيه لقمة تتاكل.
بدأ يحكي حكاوي زمان، بس وقف فجأة.
حكاوي قديمة.. خلاص مفيش داعي للكلام فيها.
وطى راسه، وكمل تضفير الليف.
كنت هموت وأعرف بقية الحكاية، بس مقدرتش أسأل.
خفت أفتح جروح قديمة وجعاه.
بعد تلت شهور، زينب عرفت إنها حامل.
المفروض يكون خبر يفرح، بس دلوقتي بقى هم جديد وحمل تقيل.
البيت ضيق علينا، وهيزيد علينا عيل كمان؟!
كانت بتمسح على بطنها، وعينها مليانة قلق.
ربنا بيرزق، وهنشوف حل، يمكن ننقل لشقة أوسع.
حاولت أطمنها.
نقل الشقة محتاج فلوس كتير، ومصاريف العيل كتير، وكمان مصاريف جدي.
صوتها كان بيعلى وبيزيد حدة.
هنجيب منين؟
ربنا هيسهل.
مكنتش عارف أقول إيه، بس بحاول أتمسك بالأمل.
هيسهل إزاي؟ قولي!
وقفت وحطت إيدها في وسطها وبصتلي بتحدي.
بدأت أحسب مصاريف البيت، وفعلاً الدنيا كانت مزنوقة جداً.
من يوم ما جدي جه، ومصاريف الأكل زادت بشكل ملحوظ.
رغم إنه بياكل قليل، بس برضه بقى فم جديد في البيت.
ده غير مصاريف العلاج.
هو كبر، وكل شوية يجيله دور تعب خفيف.
برد، سخونية.. وكل ده بيحتاج علاج وروشتات.
المرة اللي فاتت، الروشتة كلفتنا أكتر من متين جنيه!
زينب بدأت تعد وتحسب
وفيتامينات الكبار، العلبة ب خمسين جنيه.
طب إيه رأيك لو أشوف شغلانة تانية بعد الظهر؟
اقترحت بحسن نية.
أنت مش ناقص تعب يا محروس!
زينب بصتلي بنظرة لوم
أنا شايفة إننا لازم نخلي عمك الكبير ياخد جدك عنده. احنا مش هنستحمله اكتر من كده
لسه هرد عليها سمعت صوت عكازه بيقع على الارض وعرفت انه سمعنا
طلعت بسرعه لقيته رايح اوضته
حصلته بسرعه وانا بقول...حقك عليا انا يا جدي انا..
بس اللي شوفته اول ما دخلت الاوضة خلى عروقي اتجمدت ومقدرتش
جمدت في مكاني وكأن رجلي غرزت في أرضية الأوضة، والكلمة اللي كنت هقولها وقفت في زوري. جدي كان واقف في نص الأوضة، ضهره ليا،
