قصه بقلم لمياء شاهين

ازاي ابن اختي اللي مبيعرفش يحط لسانه جوه بقه كان السبب في كشف مصيبه؟

تقول صاحبة القصة:

ابن اختي كول عنده 8 سنين.. دايمًا بيحب يقول أي حاجة تخطر على باله.. يعني ممكن فجأة تلاقيه بيسألك لو الشجر بيحس بوجع لما يتقطع؟ والا ليه الكبار بيشربوا قهوة مع إن طعمها عامل زي التراب؟ الحاجات الغريبة العادية بتاعة الأطفال دي..

بس الصيف اللي فات واحنا معزومين على حفلة شوي عند عمي قال الحاجة اللي وقفت الدم حرفيًا في عروقنا.. الحفلة كانت في بيت عمي بن زي ما بنعمل كل صيف..

عمي كان عايش لوحده في البيت ده.. ماكنش متجوز والا عنده صاحبه.. البيت كان كبير والقبو بتاعه أو البدروم يعني كان محوله لمكتب يشتغل منه وممنوع حد يدخله..

شخص عادي جدًا بيشتغل وبيدرب فريق كرة للأطفال متطوع.. وكان راجل في حاله وطيب.. ماكنش في أي حاجة مريبه في عمي بن..

كول كان بيجري مع باقي الولاد طول اليوم ومستغلين المكان والجنينه الكبيرة.. وحمام السباحة واللعب..

حوالي الساعة 4 اختفى جوه البيت بعد ما قال إنه هيروح الحمام.. كنا فاكرينه هيدخل

يستخدمه ويغسل وشه ويطلع بسبب الحر.. بس هو اتأخر حوالي 15 دقيقه.. ولما رجع وقف في نص المكان اللي كل الكبار كانوا متجمعين وقاعدين فيه.. وسأل "ليه العم بن سايب مراته في القبو؟؟"

كلنا اتجمدنا ومحدش فينا نطق.. وش عمي بن بقى لونه أبيض وكأنه ورقه فاضيه..

ام كول.. ايما اختي ضحكت.. الضحكة اللي بتحصل في المواقف المحرجة.. وردت على ابنها وقالت "كول.. العم بن مش متجوز.. فاكر؟"

بس كول هز راسه بجديه وقال "لا متجوز.. انا شوفتها من الشباك.. عندها شعر اسود طويل.. وعملت لي باي باي"

عمي بن فضل يضحك ويهزر على كلام كول وقاله "انت غالبًا شوفت انعكاس للتلفزيون"

بس كول كان مصر وقال "لا.. كانت ست بجد.. وكان شكلها حزين وحطت ايدها على الازاز من ورا القضبان  زي كده" وفعلًا ضغط على الباب قدامنا بطريقة معينه..

كل اللي كانوا موجودين بصوا لبعض وكأنهم بيحاولوا يكتشفوا هو كلام كول بجد والا ده كله من خياله الواسع..
ايما سحبت كول على جنب وطلبت منه يوريها الست دي كانت فين بالظبط.. كول أخدها لجنب البيت ووراها الشباك بتاع

القبو اللي كان أعلى من الأرض بحاجة بسيطة جدًا.. وكان عليه قضبان لأنه قريب من الأرض جدًا..

كول شاور على جوه وقال "كانت قاعده على السرير.. لما شافتني اتحمست جدًا وبدأت تشاور لي بأيدها"

ايما بصت جوه بس معرفتش تشوف أي حاجة.. الدنيا كانت ضلمه أوي جوه..

في نفس اليوم بالليل كول لما روح رسم واحدة ست شعرها اسود وطويل.. واقفه ورا قضبان حديد.. وتحت الرسمة كتب بخطه الصغير الملخبط "قالت لي مقولش حاجة.. بس أنا حاسس إنها محتاجة مساعدة"

إيما اتصلت بيا وحكت لي كل اللي حصل.. وبعتت لي صورة للرسمة بتاعة كول.. أول ما شوفتها حسيت بخوف حقيقي..

كول عمره ما نزل القبو عند عمي بن.. بس من كلام إيما معاه اداها تفاصيل محدده.. تفاصيل استحالة يكون اتخيلها.. بطانية موف.. ترابيزه صغيرة عليها كتب.. جردل على الجنب..
إيما قررت تتصل بالشرطة تاني يوم الصبح.. كانت حاسه إنها مجنونه انها بتعمل كده على كلام عيل.. بس برده حاجة في كلام كول كانت بتحركها.. الطريقة اللي وصف بيها وش الست.. وازاي بيقول إنها كانت خايفه..

لما الشرطة وصلت

بيت عمي بن في نفس اليوم على الضهر.. حاول يتصرف بشكل طبيعي.. عمل لهم قهوة وقالهم "طبعًا دوروا براحتكم في البيت" بس لما سألوه عن القبو بان عليه التوتر.. بدأ يتلجلج في الكلام.. وده خلى الشرطة تقتنع إن في حاجة غلط..

لما نزلوا يدوروا لقوا واحدة فعلًا محبوسة في القبو.. كان اسمها رايتشل وكانت صاحبة عمي بن من سنتين.. رايتشل اختفت فجأة والكل كان فاكر إنها عزلت من الولاية..

عمي بن اقنعها إن اسرتها ماكنتش عايزاها.. وإن العالم بره خطر.. وإن هو الوحيد اللي بيفكر فيها وخايف عليها.. وخلاها تعيش في القبو ده لمدة سنة ونص..

كان كل يوم بيجيب لها أكل وبيقولها إنها أمان أكتر جوه القبو.. رايتشل كانت مصدقاه عشان كان عندها مشاكل مع القلق والاكتئاب.. عمي بن خلاها تعتمد عليه تمامًا.. بس لما شافت كول في الشباك حاجة جواها اتغيرت..

ساعتها بس حست إن كل حاجة بتحصل غلط.. مينفعش إن طفل صغير يشوفها كده..

اتقبض على عمي بن في نفس اليوم.. رايتشل اتنقلت على مصحة وبتتعالج.. كول أنقذ حياتها عشان بس هو الطفل اللي مبيقدرش يحط

لسانه جوه بقه..

#احاديث_تيكتوكيه
#LamiaaShaheen